អ្នកគ្រប់គ្រងផ្នែកជួលផ្សារទំនើបអូឡាំព្យា បានបញ្ជាក់កាលពីថ្ងៃទី ១៧ ខែ កញ្ញា ថា ការសាងសង់ផ្សារទំនើបអូឡាំព្យាក្នុងដំណាក់កាលទី ២ គឺគ្រោងនឹងបញ្ចប់ក្នុងខែ ឆមាសទី២ ឆ្នាំ ២០២០ ហើយនឹងបើកឲ្យដំណើរការក្នុងត្រីមាសទី ៤ នៃ ឆ្នាំ ២០២១។ ក្រុមហ៊ុនរំពឹងថា ផ្សារទំនើបនេះនឹងអាចទទួលភ្ញៀវបានពីចន្លោះពី ៤ ទៅ ៥ម៉ឺននាក់ ប្រចាំថ្ងៃ ខណៈបច្ចុប្បន្ននេះ គឺអាចទទួលភ្ញៀវបានប្រមាណ ២ ម៉ឺននាក់ ក្នុងមួយថ្ងៃៗ។

ក្នុងដំណាក់កាលទី ២ នេះដែរ ក្រុមហ៊ុននឹងធ្វើការផ្តោតទៅលើផ្នែកម្ហូបអាហារ ការកំសាន្ត ផលិតផលម៉ាក់ល្បីៗ ដូចជា ហាងលក់ទំនិញ កាបូប ស្បែកជើង នាទ្បិកាដៃ គ្រឿងអលង្កា ផលិតផលកែសម្ភស្ស ជាដើម សម្រាប់ទាក់ទាញភ្ញៀវដែលមានជីវភាពកម្រិតមធ្យម និងខ្ពស់។

នៅពេលដាក់ឲ្យដំណើរការ ផ្សារទំនើបអូឡាំព្យា នឹងមានហាងសរុបសម្រាប់ជួលប្រមាណជា ២៥០ យូនីត ខណៈបច្ចុប្បន្នមានត្រឹម ១០០ យូនីត។

តាមការបញ្ជាក់ដដែល ក្រុមហ៊ុននឹងធ្វើឲ្យផ្សារទំនើបមួយនេះកាន់តែមានភាពទាក់ទាញ ជាមួយនឹងការបង្កើតកន្លែងកំសាន្ត និងការរចនាមួយចំនួនទៀតដែលមិនធ្លាប់មានពីមុនមកនៅកម្ពុជា។

លោកថ្លែងថា៖ « យើងមានការកំសាន្ត ហើយយើងមានក្រុមហ៊ុនគ្រប់គ្រងមកពីតៃវ៉ាន់ដែលគាត់ធ្លាប់មានបទពិសោធន៍ជោគជ័យនៅតៃវ៉ាន់ យើងនឹងពង្រឹងលើគុណភាព សេវាកម្ម ដើម្បីឲ្យម៉ល (ផ្សារ) យើងរីកចម្រើន នេះគឺជាអ្វីដែលយើងចង់បាន ហើយកំពុងអនុវត្ត»។

ផ្សារទំនើបអូឡាំព្យាគឺពន្ធ័ជុំវិញដោយអគារ៥៣ជាន់ សណ្ឋាគារ ៣៨ ជាន់ និងអគារលំនៅដ្ឋាន ដែលជាចំណុចខ្លាំង បន្ថែមជាមួយនឹងស្ពានអាកាសថ្មើរជើងភ្ជាប់ចូលមកក្នុងផ្សារ ដែលមិនធ្លាប់មានពីមុនមក ខណៈផ្សារទំនើបនេះស្ថិតក្នុងទីតាំងដ៏មានសក្តានុពលក្នុងរាជធានីភ្នំពេញ នេះបើតាមការបញ្ជាក់របស់លោក សៅ ម៉ូណាស៊ី។

នៅពេលបើកឲ្យដំណើរការដំណាក់កាលទី២បន្ថែមទៀត ផ្សារទំនើបអូឡាំព្យា នឹងមានរោងកុនសម្រាប់ក្រុមគ្រួសារ អាងហែលទឹកលើអាកាសដែលមានទេសភាពស្រស់ស្អាត ហើយអាចមើលឃើញកីទ្បដ្ឋានជាតិអូទ្បាំពិក ក្លឹបហាត់ប្រាណ កន្លែងលេងកីទ្បា សួនច្បារ ស្ពានកញ្ចក់លើអាកាស និងការរចនានានាបន្ថែមទៀត។

ប្រភព៖ សមាគមអ្នកសាងសង់កម្ពុជា: https://construction-property.com/km/olympia-mall